Espera que vou mexar é un grupo de cantos de taberna orixinario de Viveiro. O seu repertorio céntrase en cancións tradicionais galegas, e o seu obxectivo é transmitir a alegría e a esencia festiva da música popular. Imprescindibles en calquer foliada que se precie, gozaremos da súa música e diversión a ritmo de gaita, bombo e tambor!

As Lambe Lambe son un conxunto de pandeireteiras e cantareiras de Vilalba, no corazón da Chaira. Este grupo vive a música tradicional galega non só como arte, senón como un xeito de vida, unha filosofía que busca recuperar e difundir o legado cultural das súas antergas.

A súa habilidade musical vai máis alá das pandeiretas, dominando instrumentos típicos das festas e labores cotiás do rural galego. As súas voces e mans dan vida a cunchas, culleres, pandeiros, latas e tixolas, creando unha atmosfera que rememora os tempos de outrora.

O repertorio das Lambe Lambe é unha mestura de cantigas tradicionais recollidas, adaptacións e composicións propias, mostrando un profundo respecto pola tradición e unha clara visión de futuro.

A pesar de que a súa traxectoria musical é longa, o grupo consolidouse recentemente tras participar nun concurso local en 2022, o que lles deu o impulso necesario para seguir adiante.

Dende entón, as Lambe Lambe teñen actuado en diversos festivais da comarca, co firme propósito de integrar a música tradicional en eventos modernos e facela accesible a novas audiencias que aínda non descubriron o seu valor inestimable. Con cada actuación, as Lambe Lambe non só comparten melodías; transmiten unha parte viva da identidade galega.

A música de Os do 21 é unha celebración das raíces culturais de Galicia. Nela  combinan elementos tradicionais con toques contemporáneos. Inclúen instrumentos como a gaita, a pandeireta, o bombo, o tambor ou a acordeón e as súas actuacións abranguen dende os tradicionais e populares cantos de taberna ata representacións de baile tradicional  en mostras folclóricas e outro tipo de eventos. É por todo isto polo que non podían faltar no noso festival! Achegádevos a gozar e bailar con elas/es!

Amigos do Folk destacan pola súa enerxía e paixón pola música tradicional galega. Formados recentemente, xa realizaron varias actuacións notables por Viveiro e a súa contorna. A súa música, que combina melodías tradicionais con ritmos contemporáneos, é coñecida por achegar ás parroquias a súa capacidade para conectar co público de todas as idades. A súa actuación no noso festival promete ser unha celebración da nosa música que non podedes perder!

Manu Kasoaparte, figura icónica na escena punk galega, traerá ó noso festival a súa voz e enerxía contaxiosa. Na súa música reflicte a súa visión única do mundo, combinando melodías punk crudas con letras poéticas e incisivas. Non volo perdades!

O burelés Zé Pequeno (Emilio López, ex-Skornabois), cantante e produtor de Safari Orquestra, comezou a súa carreira como DJ xa hai uns anos e, dende entón, leva animando coas súas sesións diferentes festivais, pubs e clubs tanto da xeografía galega como española, convertíndose así nun dos DJs máis influentes de Galiza. Foi DJ residente durante varios anos en A Casa das Crechas en Compostela, onde comezou a interesarse pola World Music que combina elementos de diferentes culturas e tradicións musicais e na cal basea as súas actuacións. Ídevolo perder?

Nome artístico de Francisco Manuel Cerdeira Castiñeiras, recoñecido músico, compositor, produtor e figura emblemática da música infantil galega. A súa traxectoria musical comezou como membro do grupo Mamá Cabra, e máis tarde, en 2014, creou a banda A Gramola Gominola, coa que lanzou varios traballos discográficos orientados ao público máis novo.

O seu debut en solitario chegou en 2017 co álbum “Pakolas”, publicado por Editorial Galaxia na súa colección Sonárbore. Este traballo foi seguido por “Ramona Órbita, a Dona do Tempo” en 2020 e “A Ramona Pequena vai á Lúa” en 2023, ambos tamén acompañados de libros ilustrados por Laura Romero.

Pakolas destaca pola súa capacidade de conectar coa rapazada a través da música, combinando letras educativas con melodías pegadizas. O seu estilo único e a súa dedicación á música infantil foron recoñecidos con varios premios, incluíndo o XIV Premio Rosalía de Castro da Deputación da Coruña e sendo finalista varias veces no Premios Martín Códax da Música na categoría de Música Infantil.

Os concertos de Pakolas son coñecidos pola súa enerxía e a súa capacidade de involucrar ao público de todas as idades, facendo dos seus espectáculos unha experiencia inesquecible para as familias! Non volo perdades!

Loita Amada entrou de cheo na escena musical galega coa súa mestura de canción de autor, protesta e rock. Co carismático Jásper á fronte pasarán polo Festival Aturuxo no medio da súa xira do seu último traballo, Rematou o simulacro, unha viraxe significativa respecto ao seu anterior traballo, mergullándose nun son máis roqueiro e intenso. Na súa curta traxectoria, marcada pola evolución e a reinvención, podemos apreciar influencias que van dende o punk ata o metal, pasando polo grunge e a música tradicional. A súa música é unha celebración da cultura galega, unha voz para os que creen nun mundo máis xusto e unha chamada á acción a través da arte.